Sri Lanka-a emergeny puan hlip

Sri Lanka sorkarin an rama Muslim leh Buddhist-te inkara buaina chhuak vanga emergency a puan chu boruakin ziaawm lam a pan tawh avangin nimin khan President Maithripala Sirisena chuan a hlip.

Kandy district-a Buddhist leh Muslim-te inkara buaina chhuak vangin mi eng emaw zat an thi a, Muslim-te sumdawnna hmun leh mosque pawh eng emaw zat tihchhiat a ni bawk. Buddhist-te hian Muslim-te chu tihluihna hmanga Islam sakhuaa midangte inlehtirah leh Buddhist ho hmun pawimawhte suasamah puhin an bei let a ni. Buaina chhuak vang hian ram President chuan emergency a puang a, hei bakah hian buaina punlun tur ven nan social media website-te pawh khar a ni bawk.

Emergency puan anih hnuah pawh Kandy bialah mipui lungawi lote an chhuahkhawm fo a, he bialah hian sipai ṭhahnem tham tak tirhluh niin mipui pungkhawmte hnawhdarh nan tear gas-te pawh hman a ni. Buaina chhuak kaihhnawihah hian mi 300 chuang man an ni hman a ni.