Russia President atan Putin-a hneh takin thlang tling

Pathianni-a Russia president thlanna neihah president ṭanglai, Vladimir Putin chu hneh taka thlantlin a ni. Kum 2024 thleng Russia President a ni chhunzawm leh thei dawn a ni.

Official result tihchhuahah Putin hian vote tla aṭangin 76% chuang a hmu phak a ni. Hetihlai hian Putin-a el pha ber tur ngaih, eptu pawl lian ber hruaitu Alexei Navalny chuan inthlanah hian a chuh ve thei lo a ni.

Vladimir Putin hian kum 1999 aṭang Russia ram hruaitu dinhmun hi chelhin, president leh prime minister dinhmunte a chelh a ni. Russia constitution chuan president dinhmun hi a zawnin term hnih chin bak chelh a remti lo a, hei vang hian putin hian a zawna term hnih a chelh hnu ah kum 2008 khan prime minister in a awm a, 2012 inthlanah president hi a chuh leh a ni. Kum 2012 aṭang khan president term, kum li ni ṭhin chu kum rukah pun a ni bawk.

Inthlan result puan a nih hnua Moscow-a chanchin thar lakhawmtute a kawmnaah, Putin chuan mipuite chuan a kaihhruai sorkarin an ram tana a hnathawh leh hlawhtlinna a hmuh hrang hrangte an hriatpui tih a lang chiang hle a ni, a ti.

President candidate zinga Putin-a hnaih bertu, millionaire communist Pavel Grudinin chuan vote tla aṭangin 12% chauh a hmu pha a, TV host hlui Ksenia sobchak chuan 2% leh veteran nationalist Vladimir Zhrininovsky chuan 6% an hmu bawk.

Kum 2012 inthlanah khan Putin hian vote tla aṭangin 64% a hmu a, kumin hian a hma aiin a che ṭha zui a ni. Putin-a campaign team chuan hnehna ropui tak a ni tih an sawi.

Hetihlai hian independent election monitoring group Golos chuan vote thlaknaah hian thil fel tawk lo tam tak a awm niin a sawi. Obsever-te chu polling station luh khapsak an ni a, mi ṭhenkhat chu vote thlak luihtir turin bus-ahte phurh an ni a, polling station-a webcam-te chu balloon leh thil danga hliah tir vek niin an sawi bawk.