Syria President-in Eastern Ghouta a tlawh

Syria President Bashar al-Assad chuan Syria sipai leh helte inbeihna, Damascus khaw daia Eastern Ghouta chu Pathianni khan a tlawh.

Eastern Ghouta-a inbeihnaah hian sipaite hian hma an sawn zel nia sawi a ni a, kar hmasa chhung khan civil mi eng emaw zat chu chhuahtir an ni tawh bawk. President Assad hian helho nena inbeihnaa sipai hmatawngte awmna hmun tlawhin, sipaite a kawm nghal bawk a ni.

Syria sipaite chuan Eastern Ghouta-a hmun 80% chu helho kut aṭang hian an lakir tawh tih sawiin, Pathianni khan Saqba khua pawh an la let tawh a, Kafar Batna khua laklet tumin an bei leh mek a ni. Eastern Ghouta hi km 105 biala zau niin, he bial chhungah hian khua leh thlai chinna ram eng emaw zat a awm a, he bial chhunga mihring awm zat hi nuai li ve an ni.

Eastern Ghouta chhungah hian helpawl lian pali–Islam Army, Failaq al-Rahman, Ahrar al-Sahm leh Levant Liberation Committee-te an inkhuar a ni.

Activist-te chuan thla hmasa aṭang khan sipaite beihpui thlak avangin mi 1,000 vel an thi tawh niin an sawi.