EU-in Covid-19 vangin Ni 30 chhung atan ramri khar

Covid-19 leng mek avangin European Union (EU) chuan ni 30 chhung atan ramri a khar a, an bloc member ni lo ram aṭanga luh a khap. 

Ram dang khualzin luh khapna hian EU ram 26 te bakah, Iceland, Liechtenstein, Norway leh Switzerland-te pawh a huam vek dawn a, United Kingdom (UK) erawh zin phal loh hian a huam lo ang. Ram dang aṭanga EU-a zin phal loh a nih rual hian bungraw mamawh, health lama hnathawkte leh pawimawh thila ram hruaitute inzin tawn erawh khapna hian a huam lo thung.

Anni huna Thawhlehni tlai khan EU hruaitute chu video conference  hmanga summit neiin, he hunah hian EU ramte chuan Covid-19 laka mipui him zawk nan ramria khuahkhirhna leh ram dang aṭanga an rama zin luh khapna siam an rel a ni. "Kan hmalakna hi a ṭha kan ti tlang a, khawvel hi tunah chuan he hri beih nan hian kan ṭanrual a ngai takzet tawh a ni," tiin EU Commission chief Ursula von der Leyen chuan thuthar thehdarhtute hmaah a sawi.

Thlei bik nei lo Covid-19 chuan khawvela ram ropui bera ngaih United States-a state 50 awmte chu a tuam chhuak tawh.

Thawhlehnia US-a West Virginia state-a kai thar an awm hriat a nih hnu hian, US-a state 50-ahte chuan he hri hi a darh tawh tih hriatchian a ni ta a ni. An state-a kai thar an awm chungchangah hian West Virginia governor Jim Justice chuan "Kan rinlawk ang ngeiin thil a lo thleng ta a ni," a ti. US-ah hian he hri vanga thi hi mi 108 an awm tling tawh a, he hri kai hi mi 6,300 chuang an awm tawh bawk.

Israel health ministry chuan an rama Covid-19 kai zat chu darkar 24 chhungin 40% a pungin, he hri kai finfiah tawh hi mi 427 an awm tawh tih nimin khan a sawi. 

Prime minister Benjamin Netanyahu chuan hri darh zel tur venna atan mipuite chu pawn chhuak lo turin a ngen a, nitin mi 3,000 te coronavirus test neihsak ziah an tum tih a sawi bawk. West Bank-ah pawh Covid-19 kai hi mi 44 an awm tawh tih Palestinian  health official-te chuan an sawi a, mahse Gaza Strip-ah erawh he hri kai hi an la awm lo nia sawi a ni thung. 

China president Xi Jinping chuan Spain sor­karin Covid-19 do letna beihpui a thlak mekah China chuan theihtawpin a pui dawn tin Spain prime minister Pedro Sanchez nena Thawhlehni zana tele­phone-a an inbiaknaah a hrilh. 

Xi Jinping chuan China rama hri leng chu ram mipuite thawhrimna leh thawhhona ṭhat avangin a darh zel tur khuah­khirhnaah hlawhtlinna ṭha tak an nei thei tih a sawi a, China chuan a hun tawn khirh ber leh harsa tak chu a paltlang thei a ni, a ti. Hetih lai hian ram hrang hranga Covid-19 darh mekah China chuan a theih angin heng hri lenna ramte hi puih zel a tum tih a sawi. 

Britain sorkar chuan Covid-19 lengin sumdawng te a nghawng buai avangin, sumdawng te puihna tur kawng khat atan loan pound tluklehdingawn 330 (US dollar tluklehdingawn 399) a pe dawn tih Chancellor of the Exchequer Rishi Sunka chuan a sawi. 

Sunak chuan, sum mamawh zat hei aia a tam a nih pawhin ruahmanna an siam zel dawn tih a sawi bawk. Hri leng vang hian sector ṭhenkhat chuan harsatna nasa tak an tawk chho mek a, hei vang hian Secretary of State for Transport nen pawh airline leh airport-te puihna tur, special package siam dan chungchang pawh an sawidun thuai tur thu a sawi bawk. 

France sorkar chuan an rama hri darh zel tur venna atan Thawhlehni aṭang khan Paris khawpuiah mipuite pawnchhuah a khap. He khuahkhirhna siam chhunga pawn chhuah ngaite chuan online hmangin dilna an thehluh a, an chhuah ngaihna chhan leh an kalna turte an tarlan tel a ngai a ni.

Interior minister Christophe Castaner chuan thupek hi puangin, "Thupek chu 'Inah awm rawh u' tih a ni. Hei hi inhremna lam a ni lo a, mahse khua leh tuiten he harsatna paltlang tura mawhphurhna an neihte an hlenchhuahna tur a ni", a ti. Inhrem duh lo mah se a ṭul  chuan dan bawhchhiate chu hrem an hreh dawn lo tih a sawi bawk. 

Pawn chhuah khapna thupek bawhchhia a, phalna nei loa chhuakte chu euro 135 (US dollar 149) chawi tir theih an ni ang. 

Italy-ah chuan Thawhlehni thleng khan he hri kai hi mi 31,506 an awm tawh a, mi 2,503 in an thihpui tawh bawk. Hetih lai hian he hri kai, enkawl dam tawh chu mi 2,941 an awm bawk. Italy ram hi China tih lohah chuan hri leng tuar nasa ber leh, he hri vanga thi an tamna ber ram a ni tawh a ni.