US-SKorea military drill neih hun tur ruat fel

US leh South Korea sipaiten nunchan an zirho hun tur chu sawn hlat a ni hnuah April 1 aṭangin neih ṭan a ni dawn tih an sawi.

Joint military drill hi March thlaa neih tura tih kha a ni a, mahse South Korea-in Winter Olympics a thlen avangin a hun hi sawn a ni.

Joint military drill neih tur, Foald Eagles and Key Resolve drill hi khawmual, tuipui leh boruak-ahte neih ani dawn a, he hunah hian ram pahnih aṭangin sipai nuai thum chuang an tel rin a ni.

US leh South Korea sipaite hian kumtin joint drill hi an nei ṭhin a, hei hi SKorea ram ṭhenawm, North Korea chu ngaimawhin a sawisel fo a ni. NKorea chuan ram pahnih sipaiten nunchan an zirho chu an ram beihna tura an inbuatsaihna niin a puh a, drill an neih chhung hian missile pawh a lo enchhin fo tawh a ni.

Pentagon chuan tun ṭuma joint drill neih tur hi NKorea pawh an hrilh lawk thu a sawi a, sipaite nunchan zirho chu midang beih tumna ni loin, anmahni beih tumtu laka lo inven dan an zirna a ni tih sawiin, NKorea tan lo ngaihmawh tur a awm lo niin a sawi.

Tun thla tir lam khan US President Donald Trump chuan NKorea hotu Kim Jong-un an inbe tura a sawmna chu a lo pawmsak tawh a, hei hi tihpuitlin a nih chuan US President ṭanglaiin NKorea ram hotu hmaichhana inbiakna a neihpuina hmasa ber tur a ni ang. NKorea Foreign Minister Ri Yong-ho chu Sweden ramah a zin a, hei hi hruaitu pahnihte inbiakna neih tura atana lo inbuatsaih lawkna nia ngaih a ni.