Palestinian President-in Trump-a policy sawisel

Palestinian President Mahmud Abbas chuan US President Donald Trump-a policy chu na taka sawiselin, Israel-a US ambassador David Friedman chu 'uicho fapa' tiin a sawi.

Ramallah-a Palestinian hruaitute nena an inkawmnaah Abbas chun he thu hi a sawichhuak a ni.

Nikum December thlaa US President Trump-an Israel khawpuiah Jerusalem a pawm thu a puan aṭang khan Abbas-a kaihhruai sorkar leh US sorkar inkar boruak hi a ṭha lo chho hle a ni. Palestinian-te chuan Jerusalem hi Israel khawpuiah an pawm thei lo a, Palestinian ram hran a din hnuah Jerusalem khawchhak lam, East Jerusalem chu an khawpui atana hman an tum a ni.

David Friedman hi Trump-a personal lawyer a ni ṭhin a, nikum khan Israel-a US ambassador atan hian ruat a ni. Friedman hi Israel sorkarin Palestinian ram a luah, West Bank-a Juda-te chenna in a sak thlawptu nghet tak a ni. Hetih lai hian international law hnuaiah Israel-in Juda-te chenna tur in a sak hi dan kalh nia sawi a ni thung.