Trump-an ruihhloa sumdawngte thi tura hremna pek duh

US President Donald Trump chuan ruihhloa sumdawngte chu thi tura hremna pek a duh thu a sawi.

New Hamsphire-a thu a sawinaah he rawtna hi President Trump chuan a sawichhuak a ni. Trump chuan a kaihhruai sorkar chuan ruihhlo zuarte tihhlum an nih theihna turin an dan hman mek pawh siamṭhat a tum tih a sawi a, mahse hei hian dodal leh sawisel a hlawh viau rin a ni.

America ramah hian mi maktauai 2.4 vel ruihhlo ngai an awm mek nia chhut a ni a, kum 2016-ah khan ruihhlo vanga thi hi mi 63,600 an tling niin health official-te chuan an sawi. Ruihhlo kaihhnawiha inthahna pawh a thleng nasa a ni.

President Trump chuan Manchester, New Hampshire-a mipui pungkhawmte hnenah ruihhlo zuarte chu na taka beihlet a hun tih sawiin, hremna na thei ang ber pek a duh thu hi a sawichhuak a ni. Trump chuan dan chu thlak a ngai a ni tih sawiin, Department of Justice pawhin theihtawp a chhuah mek a ni, a ti. Trump chuan ram ṭhenkhat chun ruihhloa sumdawngte hremna na tak pek theihna dan hi an nei tih sawiin, ruihhlo kaihhnawh buaina pawh an nei tlem zawk niin a sawi. Hei vang hian anni pawhin chak taka hma an lak a ngai a ni, a ti

Trump hian Philippines President Rodrigo Duterte-an an rama ruihhlo do beihpui a thlak mek pawh a lo fak tawh a ni. Philippines police-te chuan beihpui an thlaknaah hian ruihhlo zuar leh hmangsual nia puh mi 4,100 an tihlum tawh niin an sawi a ni. Mahse human rights group chuan thi zat hi Philippines sorkarin a sawi ai hian a let thum zetin an tam zawk niin an sawi a, International Criminal Court pawhin thil thleng hi a chhuichiang mek bawk.