Suu Kyi-i a damloh vangin a programme thulh

Australia-a cham mek, Myanmar State Counsellor Aung San Suu Kyi-i chu a damsam loa, hei vang hian Sydney-a vantlang inkhawm neihna tura a thusawi tur pawh a ṭhulh.

Suu Kyi-i hi special ASEAN-Australia summit hmang turin kar kalta Zirtawpni khan Australia-ah hian a zin a, Thawhṭanni khan Australia Prime Minister Malcom Turnbull nen an inkawm a ni. Nimin khan Sydney-a Lowy Institute-ah thu sawi tur a ni a, mahse a dam loh avangin a ṭhulh ta a ni. He hunah hian zawhna leh chhanna hun pawh buatsaih tum a ni bawk.

Myanmar sipaiten an rama Rakhine state-a Rohingya Muslim-te laka beihpui an thlak avanga Rohingya mi tam tak tawrhna thleng chungchangah Suu Kyi-i hian an thlavang hauh zawnga thu a sawi chhuah loh avangin dem a hlawh phah hle. Rakhine state aṭanga hian Rohingya mi nuai sarih dawn chu Bangladesh ramah an tlanchhia a ni.

ASEAN-Australia summit-ah pawh Rohingya mite tawrhna chungchang hi an sawiho pawimawh zingah a tel a, Pathianni-a summit an neihah hruaitu hrang hrangte chuan hemi chungchang hi Suu Kyi-i hi an lo zawt tawh a ni.