America tana thutlukna fing leh dik ber a ni - Joe Biden
US president Joe Biden chuan Afghanistan aṭanga US sipaite lakchhuah fel an ni chu America ram tana thutlukna fing leh dik ber a ni tih a sawi.
Kum 20 zet Afghanistan mission an kalpui hnuah, US hian inremna an lo siam tawh angin Thawhṭanni zan zanlai velah khan an sipaite hi an lachhuak kim ta a ni.
President Biden chuan, "President inthlan neih dawn khan, America mipuite hnenah he indona hi titawp ka lo tiam tawh a ni," tiin a lo intiam tawhnate chu tihpuitlin a ni ta tih a sawi. Afghanistan indona kalpui a nih hnu leh thutlukna siam thei tur President palina a ni tih sawiin, "Kum 20 zet indona kan hmachhawn hnuah, America fapa leh fanute chu a hma daiha lo tihtawp tawh tur, indona hmachhawn leh tur hian ka tir chhunzawm duh tawh lo a ni," a ti.
Afghanistan mission an kalpuinaah USD trillion hnih chuang an seng tih President Biden chuan a sawi bawk. Brown University-a researcher-te chuan kum 20 chhungin Afghanistan-ah hian ni khatah USD maktaduai 300 chuang zel US hian a seng niin an chhut.
Biden chuan US sipaite chhuah hma hian Afghanistan-a America mi 90% te chu hruai chhuah hman an ni tih a sawi. Hetih lai hian Afghanistan chhuahsan duh, America mi 100-200 vel an awm a, heng mite hi hruai chhuah leh ngei an tum tih a sawi a, hruai hawna tur hian hun bituk, deadline pawh an siam lo tih a sawi bawk.
US President chuan an ram sipai 13 an thihna, Kabul airport-a bomb tipuaktu, Islamic State-Khorasan province (IS-K) te vau nghalin, an la duhtawk mai dawn lo tih a sawi. "America beih leh tihnat tumte chu kan umzui zel dawn che u, an thiltih man pawh in pe ngei ang," a ti.