China special envoy-in Myanmar a tlawh

China sorkar special envoy chu kar khat chamin Myanmar-ah a zin a, Myanmar sipai hotu General Min Aung Hlaing pawh a kawm tih nimin khan Chinese foreign ministry chuan a puang.

Special Envoy for Asian Affairs Sun Guoxiang-a'n Myanmar a tlawh hun hi August 21-28 chhung kha niin, nimin khan China lam hian an puangzar chauh a ni. A cham chhung hian Gen Min Aung Hlaing nen Myanmar ram chhung dinhmun te, Covid-19 dona kawnga an hma lak leh thawhdun dante an sawidun tih Chinese foreign ministry thupuangtu Wang Wengbin chuan Thawhlehni khan a sawi.

Wang hian Myanmar mipuiten nunphung pangngaia an zawh leh theih nan leh, mipuite rorelna a rang thei anga a din leh theihna tura hmalaknaah China chuan ramdangte chu a thawhpui zel dawn a ni, a ti.

"Myanmar-a party leh pawlte chuan ram leh mipui tana hmakhua thui zawk an thlir thiam kan beisei a, an danpui huam chhungah an buaina chinfelna tura inbiakna pawh an neih ngei kan beisei a ni," tiin Wang chuan a sawi.

China hian Myanmar leh Association of Southeast Asian Nations-ten inrem­na panga, five-point consensus an siam tawh chu a thlawp thu a sawi tawh bawk. He inremna an ziah zingah hian sipaiten mipui laka kut an thlak tihtawpte pawh a tel.

February 1-a civil sorkar paihthlak a nih aṭang khan ram chhungah buaina a chhuak fo a, sipai sorkar chu civil mi tam zawkin an pawm thei lo a ni. Civil sorkar paihthlak tak aiawh tur hian parliamentarian leh civil leader hluite chuan National Unity Government an din zui bawk.

European Union, United States leh United Kingdom-te Myanmar-a sipai sorkar hi pawm loin sipaite hrekna turte pawh hi an lo puang tawh a ni. Hetih lai hian China leh Russia erawh chuan United Nations Security Council-in Myanmar hrekna tur siam a tum chu an dang thung. Myanmar sipaiten international link an neihchhunte an ni.