Myanmar President a bang

Myanmar ram President Htin Kyaw-a chu nimin khan president a niha aṭangin a bang. President office chuan Htin Kyaw-a ban thu Facebook-ah a post a ni. A banna chhan hi sawichian a ni lo a, tun hnaiah local media-te chuan President hi a hriselna a ṭha tawk lo hle niin an sawi a, mahse hei hi official-te chuan an pha thung.

Htin Kyaw-a hi State Counsellor, National League for Democracy (NLD) hruaitu Aung San Suu Kyi-i thawhpui hnai tak a ni. Myanmar sipai sorkarin an ram danpui a siam hnuaiah Suu Kyi-i hi ramdang mi pasal nei a nih avangin president dinhmun a luah thei lo a, hei vang hiam NLD chuan president atan hian kum 72 mi, Htin Kyaw-a hi a ruat a ni. Htin Kyaw-a hi president atana dah ni mah se, rorelna kawnga a hotu ber chu Suu Kyi-i hi a ni.

President office chuan Myanmar ram danpui hnuaia article 73(b) in a tarlan angin, president a ban tak avangin a hmun ruak luahkhattu tur hi ni sarih chhunga ruat a nih tur thu a sawi. President thlaktu tura hming langsar bik erawh an la awm lo.

President a ban tak avangin a thlaktu tur ruatfel a nih hma chuan Vice President Myint Swe-an president dinhmun hi a chelh rih dawn a ni.

Kum 1962 hnu lama Myanmar rama civilian president hmasa ber, Htin Kyaw-a hian ram mipuite zah a hlawh hle. Kum 2016-a president atana thlan a nih pawh khan Suu Kyi-i laka a rinawm reng tur thu leh, a chunga roreltu tur a nih tur thu a sawi a ni. Tun hnaia Rohingya Muslim-te chungchanga Suu Kyi-in sawisel leh beih a tawh lai pawhin a thlavang hauhtu leh thlawp tlattu a ni.