France police-ten President hlui Sarkozy-a hreng

France Police-te chuan Thawhlehni khan an ram president hlui Nicolas Sarkozy chu Libya ram hruaitu hlui Muammar Gaddafi hnen aṭangin a campaign-na tur sum a dawng nia puh chungchangah thu zawhfiah turin an hreng.

Kum 63 mi, Sarkozy hi Nanterre-a police station-ah koh niin, kum 2007 president thlan dawna a campaign danah thil fel tawk lo a awm nia sawi kaihnawihah thu an zawtfiah. Hemi kum inthlanah hian Sarkozy hi chakin, kum nga chhung France President dinhmun hi a chelh zui a ni.

President thlan dawna campaign laiin Sarkozy hian dan kalhin Gaddafi hnen aṭangin sum ṭhahnem tak a dawng nia sawi a ni a, kum 2013 April thla khan he puhna hi chhui ṭan a ni. Mahse Sarkozy chuan thil tih dik lo a nei lo niin a sawi thung.

Sarkozy-a thawhpui hnai tak ṭhin, Alexandre Djourhi chu London-ah man niin bail-a chhuah zui a ni. A minister hlui, Brice Hortefeux pawh thu zawhfiah a ni bawk.

France ram danah chuan candidate hian donation hi pawisa faiin pound 6,300 aia tam an dawn a khap a ni. Mahse Panana leh Switzerland-a Sarkozy bank account-ah sum tam tham tak dahluh nia sawi a ni.