Myanmar Parliament speaker thar thlang

Myanmar Parliament lower house, House of Representatives chuan nimina session a neihah speaker thar atan U T Khun Myat an thlang.

U T Khun Myat hi House of Representative-a Deputy Speaker ṭhin a ni a, Kahin bial aiawha Parliament member atan thlan niin, Union Solidarity and Development Party (USDP) member a ni.

Nilaini khan House speaker U Win Myint chuan a ban avangin amah thlaktu tur hi thlan a ni.

Nimina parliament session neihah hian house deputy speaker atan U Tun Aung chu thlan a ni nghal bawk. U Tun Aung hi National League for Democracy (NLD)-a Central Executive Committee member a ni a, kum 2015 inthlanpuiah khan Nawnghkio bial aṭanga thlan tlin a ni.

House Speaker atana thlan thar U T Khun Myat chuan thu a sawi nghal a, Myanmar parliament tan bung thar kaina tur a nih thu a sawi.

Hetih lai hian Nilaini-a a hriselna ṭhat tawk loh chhuanlama Myanmar president a nihna aṭanga bang, U Htin Kyaw-a thlaktu tur pawh Union Parliament chuan a thlang thuai dawn bawk a ni. President-in banna a thehluh hnu lawkah House Speaker U Win Myint hi banna a thehlut ve nghal a, hei vang han President thlaktu atana dah a nih ringtu pawh an tam hle.

Kum 2008-a an ram danpui siam behchhanin, president a ban tak avang hian First Vice President U Myint Swe chuan acting president hna a thawk rih dawn a, mahse ni sarih chhungin president thar hi thlan a ni ang.