Africa ramten inremna siam

Africa khawmualpuia ram 44-te chuan Nilaini khan insumdawn tawnna awlsam zawk an neih theihna tura inremna, African Continental Free Trade Area (AfCFTA) chu Rwanda khawpui, Kigali-ah an ziak.

He inremna hi African Union (AU) in 10th Extraordinary Session of the Assembly an neihnaah ziah a ni a, he summit-ah hian Africa ram sorkar hotu lu 19 an tel a ni.

Inremna an siamah hian member ram aiawh hrang hrangten an hming an ziah hnuah AU Commissin Chairperson Moussa Faki Mahamat hnenah hlan a ni. He inremna siam hi ram hrang hrangte hian an ram dan nen a inmil em tih an enfiah hnuah nemnghet tura thehluh leh a ni ang.

AU Commission Chairperson chuan inremna an siam thei chu Africa ramte tana thil chhinchhiah tlak tak a nih thu a sawi a, Africa ramte inzawmna leh inpumkhatna ṭha zawk siamna tura ke an penna pawimawh tak a ni, a ti.

AfCFTA in a tum ber chu Africa khawmualpuia ram hrang hrangte tan sumdawnna leh invenstment lam chak zawka kalpui a nih theihna tura bungrua leh service lama single continental market siam a ni. AfCFTA hian Africa chu World Trade Organizaton din anih hnuah free trade area lian berah a siam thei dawn niin AU chuan a tarlang.