Facebook CEO Zuckerberg-an an tihsual a pawm

Facebook CEO Mark Zuckerberg-a chuan Facebook-a data leak chungchang chu a company tihsual a nih tih a pawm thu sawiin, him leh ṭha zawka siam a nih theihna turin theihtawp chhuah a ngai tih a sawi.

US leh British media-te chuan kum 2016-a US President thlan dawna campaign lai khan British data analysis company, Cambridge Analytica chuan dik lo takin Facebook hmangtu mi maktaduai 50 chuang zet data chu politics khelhna hmanrua atan dik lo taka an hman thu an lo tarlang tawh a ni.

Zuckerberg-a chuan hetianga Facebook hmangtute data khawi leh ensak theiha awm chu a thlen nawn tawh lohna turin hma an la dawn tih a sawi. User data leak nia sawi chungchang chhui chiang tur hian digital forensics firm, Stroz Friedberg pawh an ruai nghal niin Thawhṭanni khan an tarlang.

Facebook data leak thu hailan a nih hnu hian social media company lian hi Wall Street-a a stock 7% zetin a tlahniam hman a, hei hi kum li chhunga a stock tlakhniam nasat ber ṭum a ni.