Taliban sorkar hotu atan Haibatullah Akhunzada ruat

Aghanistan-a thuneitu thar, Taliban chuan sorkar thar an siam turah Haibatullah Akhunzada chu a hotu lu berah dah a ni dawn tih an tichiang tawh.

Taliban cultural commission member, Anamullah Samangani chuan Haibatullah Akhunzada chu sorkar hotu lu ber, supreme leader a ni dawn tih a sawi a, prime minister post pawh an siam tel dawn tih an sawi bawk.

Sorkar thar siam tur hi an tifel tawh nia sawi a ni a, mahse eng system nge an hman dawn tih leh, national flag leh national anthem an hman tur chungchang erawh an la sawilang lo. Report ṭhenkhat chuan Taliban-te hian Iran sorkar kalphung anga kal an tum niin an sawi. Iran-ah hian Supreme Leader chu sorkar hotu lu ber, politics leh sakhaw thilah pawh a hotu ber niin President aiin thu a nei zawk.

Afghanistan hotu thar tura ruat, Akhunzada hi mipui hmuhah a in pholang ngai lo a, a awmna chin pawh puanzar a ni ngai lo. Tunah hian Kandahar-ah a awm mek a,Taliban leh Afghan hruaitute conference a neihpui mek a ni. Supreme Leader a nih hnuah pawh Kandahar aṭangin hna a thawk dawn nia sawi a ni bawk. Taliban official Ahmadullah Muttaqi chuan sorkar thar lawmna hi Kabul-a Presidential Palace-ah neih a ni dawn tih a sawi.

Sorkar tharah hian Taliban dintu zinga mi, Mullah Abdul Ghani Baradar; deputy leader ni mek Sirajuddin Haqqani, Taliban movement founder Muallah Mohammad Omar-a fapa Mawlawi Mohammad Yaqoob-te chu chanvo pawimawh tak tak chelh tura rin an ni bawk.

Taliban-te hian province leh district hrang hrangah governor, police chief leh police commander-te an ruat fel tawh.