US-in Covid vaccine dose mtd 15 chuang tiriral tawh

United States chuan kumin March 1 aṭang khan Covid-19 vaccine dose maktaduai 15.1 vel zet chu hman lohin an tiriral tawh tih NBC News chuan a tarlang.

Vaccine tihriral te hi beisei aiin a tam a, data hi pharmacy, state leh provider dang aṭangtea lakkhawm an nih avangin a dik takah chuan hei hian a la tam zawk a rinawm thu an tarlang bawk. He zirchiannaah hian state pasarih leh federal agency liante pawh an la tel lo a ni.

Vaccine tiriral tamna chhante hi vial kehchhia te, vaccine inchawhpawlh dan dik tawk lo te, freezer chhia leh vial hawn hnua window period chhunga pek hman loh vanga hmantlak tawh lo, mipui mamawh aia tam vial pekchhuah ṭhin vangte a ni.

Hetih lai hian ram rethei zawkte chuan vaccine supply ṭhat loh vangin an ram mpuite vaccine pek kawngah harsawtna an tawk mek thung. Africa khawmualpuiah phei chuan vaccine dose bikima la hi 2.8% chiah an la awm tih OurWorld in Data chuan a tarlang.

US-ah erawh chuan vaccine dose maktaduai 440 vel an semchhuak tawh a, an ram mipui 52% te chuan dose bikim an la tawh bawk. Vaccine la duh lo miṭhahnem tak awm karah pawh heti zat hnenah hian vaccine hi pekchhuah a ni tawh tho a ni.

Covid vaccine dose hnihna lak aṭangin thla riat hnuah US chuan a dose thumna, booster dose a pe leh ṭan a, taksa lam natna dona nei ṭha tawk lo mi maktaduai khat chuang hnenah pek an ni tawh. Tun thla tawp lam aṭang hian mipui nawlpui tan pek chhuah an tum.

United States hian ram ṭhanglai leh ram rethei zawkte hnenah Covid vaccine hi dose maktaduai 600 pekchhuah a lo tiam tawh a, August thla thleng khan dose maktaduai 110 a pe tawh a ni.