Kandahar-ah victory parade nei

Taliban-te hian an ram aṭanga US sipaite an chhuah kim tak avangin hnehna an chang ta tiin an lo sawi tawh a, Nilaini khan chhim lam khawpui Kandahar-ah hnehna lawmna kawngzawh, victory parade an nei.

Kandahar-a US sipai leh Afghan sipaiten an kalsan ralthuam an kawlte an pho lang a, America siam armored vehicle hmangin kawng an zawh bawk. Humvees leh armored SUV-ah Taliban flag leh flag var tarin kawng an zawh a, heng motor zinga a tam zawk hi an la ṭha hle niin an lang. Hei bakah hian kawngzawh lai hian an kuta awm ta, Black Hawk helicopter hmangin air display pawh an nei bawk.

US sipaite hian Afghanistan-ah hmanrua tam tak an kalsan a, mahse aircraft leh sipai motor eng emaw zat chu hman zui theih lo turin an tichhia tih an sawi. America sipaite an chhuah hnua Taliban-ten thlawhtheihna an endik leh thla an lakpuite chu social media lamah hmuh tur an awm a, mahse Pentagon press secretary John Kirby chuan, "An duh tawkin an enfiahin thla te pawh an lakpui thei a, mahse an thlawhpui thei tawh dawn chuang lo a ni," tiin, US sipaite chuan airport-a an hmanraw hnutchhiah, aircraft leh ground vehicle zawng zawng chu hman zui theih loin an siam vek a ni, a ti.