Trump-an National Security Adviser a thlak

US President Donald Trump chuan Ningani khan National Security Adviser HR McMaster chu thlakin, a aiah United Nations ambassador hlui John Bolton a dah.

Donald Trump chuan twitter-ah NSA aṭang ban tak Gen McMaster chu fakin, hna ṭha taka a thawh thu leh a ṭhianṭha a nih reng tur thu a sawi. Kar hmasa khan President Trump hian Secretary of State Rex Tillerson chu banin, a aiah CIA Director thar Mike Pompeo a lo dah tawh bawk. Secretary of State thar atana Trump-an Mike Pompeo a rawtna hi US Senate-in a pawmpui ve leh phawt a ngai dawn a, NSA erawh chu Senate pawmpuina lak kher a ngai lo.

NSA atana dah thar, John Bolton hi thla 14 chhunga Trump-a national security adviser pathumna a ni. April 9 aṭangin a hna thar hi a zawm ang. Bolton hi George W. Bush-a hunlai khan Under Secretary of State for Arms Control and International Security a ni a, North Korea leh Iraq beih thlawptu niin 'war hawk' tia sawi ṭhin a ni. Ronald Reagon leh Geogre HW Bush-te hnuaiah pawh dinhmun pawimawh tak tak a lo chelh tawh bawk.

Kum 69 mi, John Bolton chuan NSA atana President Trump-an a ruat chu lawmawm a tih thu a sawi a, America ram him zawk leh chak zawk siam tura President Trump leh a team-te thawhpui a nghahhlelh thu a sawi.

NSA aṭanga ban tak, Gen McMaster chuan Ningani khan thuchhuah siamin, he dinhmun pawimawh tak chelh tirtu President Trump chunga a lawm thu a sawi a, kumin kumtawp lamah US Army aṭanga chawlh a dil tawh dawn tih a sawi bawk. Kum 55 mi McMaster hian NAS hi kum khat vel a thawk hman a ni.

White House chuan Trump leh Gen McMaster-te hian thlak a nih tur chungchangah inhriatthiamna ṭha tak an nei niin a sawi a, thlak a nih tur thu hi a hma hun eng emaw chen aṭang khan sawithawi a lo ni tawh a ni. White House reporter Tara McKelvey pawhin Gen McMaster pawh hi a hlim hmel hle tih sawiin, White House West Wing-ah pawh a thawhpui te bulah fiamthu te a thawh bawrh bawrh niin a sawi.

Republican Senator Lindsay Graham chuan NSA atana Bolton ruat a ni chu America leh a thawhpui ramte tana chanchin lawmawm, America hmelmate tana chanchin ṭha lo a nih thu a sawi. Deputy Assistant Secretary of Defence for East Asia Abraham Denmark chuan Bolton chu North Korea chunga sipai chakna hman thlawptu nghet tak a ni a, NSA atana ruat a nih chuan President Trump-a ngaihdan a tilang chiang hle a ni, a ti.