Eirua puh SKorea President hlui man

South Korea President hlui Lee Myung-bak-a chu eirua puhna thubuai eng emaw zat a neih mekah man phalna pe tura state prosecutor in a ngenna chu Seoul court chuan Ningani khan a phalsak a, hemi zan vek hian man nghal a ni.

Lee Myung-bak hian eirua an puhna hrang hrangte hi a pha vek a, a finfiahna awm ngei nia an sawi pawh thu dik lo niin a sawi a ni. Court chuan Lee hian an puhna hi a phat tlat avangin finfiahna awmte pawh tihchhiat mai a hlauhthawnawm nia sawiin hren a phalsak a ni.

Court-in man phalna a pek hnu hian Lee chuan social media lamah thu postin, a president nih lai chuan theihtawpin ram tan a thawk a, mahse thil dik lo thlengah erawh mawh phurhtir a ni ta vek niin a sawi.

Kar hmasa khan Lee hi thu zawhfiah tura koh a ni a, Seoul Central District Prosecutor Office chuan thawhṭanni khan Lee hi a thubuai hrang hrang–thamna la, sum tichingpen, chhiah awlru leh a hlawkna tura fund siama puhnaah manna tur thupek siam turin court hi a lo ngen tawh a ni.

Ningani-a court-a a chungthu ngaihtuahnaah hian Lee hi a inlan lo a, Seoul-a a inah court thutlukna hi a lo ngaichang a ni. Court-in thupek a tihchhuah hnuah prosecutor-te chuan a in aṭang hian man nghalin, Seoul chhim lama detention center-ah an dah a ni.