Japan Prime Minister Suga a bang dawn

Japan prime minister Yoshihide Suga chuan nimin khan PM a nihna aṭangin a bang dawn tih a sawi.

Nikum September thlaa PM aṭanga Shinzo Abe a ban khan Suga hian a ai a awh chho a, mahse ani pawhin he dinhmun hi kum khat a chelh hnuah ban a tum ve leh a ni. Suga hi an rama Covid-19 hri leng dona kawnga a hmalak danah sawisel a tawk fo a, mipuiten an thlawpna pawh a tlahniam chak hle a ni.

September 29-a rorellai, Liberal Democratic Party (LDP) in hruaitu thlanna an neih tura a chuh dawn lo tih nimin khan Suga chuan a sawi. LDP hian Parliament lower house-ah majority an neih avangin party hruaitu an thlan thar chu prime minister a ni nghal dawn a ni. Lower House term hi October thla tawp lam hian a tawp dawn a, November thlaah Parliament inthlan hi an neih a rinawm.

Kum 72 mi, Suga hian a office-ah a ban tur thu hi puangin thil dang a sawi belh lo a, kar leh lamah chiang zawka a la sawifiah tur thu a sawi. LDP official-te chuan party hruaitu thar tur thlan hma chu Suga hian PM hna hi a la chelh chhunzawm dawn tih an sawi.

Japan hmarlama strawberry chingtu fapa Suga hian nikum September thlaa PM dinhmun a chelh ṭan tirh khan an ram mipui thlawp a hlawh ṭha hle. Political family langsar aṭanga chhuak ni lo, mi naran maiin an ram hruaitu dinhmun a rawn chelh thei khan mipui thawpna a hmu ṭhain, office a luah tirha mipui ngaihdan lakah pawh PM atana thlawptu hi 70% chuang an tling a ni. Mahse Japan rama Covid-19 hri leng dona kawnga a hma lak dan hian sawisel a tawk chhoin duhtu pawh an tlahniam chak hle. Japan-ah hian vaccine pek chhuah hna pawh an kalpui muang hle a, an ram hmun tam zawk chu hri leng vangin khuahkhirhna hnuaiah an awm mek a, hmun ṭhenkhatah chuan khuahkhirhna hi kum khat dawn kalpui a ni tawh. Mahse hri darh zel erawh an dang hlei thei lo a, Delta variant avangin an buai chho leh mek a ni. Japan-ah hian Covid-19 vanga thi hi 16,000 dawn an tling tawh a ni.

LDP hruaitu thar dinhmun chuh tum zingah hian foreign minister hlui Fumio Kishida , internal affairs minister Sanae Takaichi, administrative reform minister Taro Kono leh defence minister hlui Shigeru Ishiba-te an tel.