Thailand PM Prayuth Chan-ocha ban phutin nawrh huaihawt

Thailand khawpui Bangkok-ah prime minister Prayuth Chan-ocha chu bang tura phutin Ningani khan mipuite'n nawrh an huaihawt.

Lungawi lohna lantirte hian PM Prayuth chu an rama hri leng dona kawnga a hma lak dan na taka sawiselin, vaccine a hun taka an dawn theih loh bakah supply duh khawp an hmuh loh avangin a hlawhchham niin an sawi. Thailand mipui maktaduai 66 chuang zingah 13% vel chauhin vaccine dose bikim an la a ni. Mipui pungkhawmte chuan PM hian banna a thehluh hma chu lungawi lohna lantir chu an tawpsan dawn lo tih an sawi.

Thailand-ah hian hri kai hmuh chhuah tawh hi mi maktaduai 1.2 chuang an awm tawh a, an zinga 12,103 in an thihpui tawh a ni. Hri kai hmuh chhuah leh thihpui zinga a tam zawk hi kumin April thla hnu lama thleng a ni.

Parliament-ah pawh eptute chuan PM leh a cabinet minister pangate chu eirua puhin, an ram economy enkawl thiam lo leh hri leng pawh ngaihthahah te an lo puh tawh bawk. Mahse PM leh a minister-te hian an puhna hi an pha thung.

Vawiin hian Parliament-ah Prayuth kaihhruai ṭangrual sorkar hi fiah a ni dawn a, mahse majority an neih avangin fiahna hi an paltlang ngei rin a ni thung.

Nawrh huaihawtte chuan Parliament member-te chuan a hnathawh ṭhat tawk loh avanga an ram mipui 10,000 chuangin an thih phahna, Prayuth leh mipuite duhdan an buk dawn nia sawiin, Prayuth hi an thlang zawk a nih pawhin ban tir ngei tumin an nawr zui zel dawn tih an sawi.