US-ah silai khuahkhirhna dan siam phutin kawng zawh

Kar kalta Inrinni khan US khawpui hrang hrangah silai khuahkhirhna dan khauh zawk siam phutin mi tam takin kawng an zawh. Kawngzawh hi US khawpui bakah Edinburgh, London, Geneva, Sydney leh Tokyo-ah te huaihawt a ni bawk.

He kawngzawh hi 'March for Our Lives' tih vuah a ni a, thla hmasaa Parkland, Florida-a school-a inkahna thlenga mi 17 in nunna an chan leh avangin he hun hi buatsaih a ni.

Kawngzawh huaihawt puina ber, Washington DC-ah chuan zirlai hruaitu leh Parkland-a pawikhawihna thlenga damchhuak, Emma Gonzalez chuan thu a sawi a ni. Parkland school-a inkahna thlenga thi te hming chhiar chhuah a nih hnuah, a sun nan minute minute ruk leh second 20 chhung ngawi rengin an ding zui bawk. Hei hi Parkland-a pawikhawihna thlen chhung rei zawng a ni.

Zirlaite huaihawta kawng zawh buatsaih hi milar tam takin an telpui a ni.

February 14-a Parkland-a Marjory Stoneman Douglas High School-a silai hmehpuah vanga mi 17 in nunna an chan kha kum 2012-a Sandy Hook-a silai hmehpuah vanga mi 26 an thih hnuah US school-a pawikhawihna thleng rapthlak ber a ni.

Parkland school naupangte chuan an school-a pawikhawihna a thlen hnu hian zirlaite him zawkna turin silai khuahkhirhna dan khauh zawk siam phutin an campaign zui a, hei hian thlawp a hlawh chho hle a ni. Zirlaite hian tun thla tir lam khan an thil phut nawrna kawng khat atan rampum huapin class an neih laiin kalchhuakin, school walk-out an lo huaihawt tawh bawk.

Inrinni tlai khan White House chuan thuchhuah siamin, zirlai leh ṭhalai ten huaisen taka an thil phut an lantir chu a fak a, sorkar chuan silai kaihhnawih pawikhawihna thleng ṭhin veng turin hma a la mek tih a sawi.

Associated Presss leh NORC Center for Public Affairs Research in mipui ngaihdan a lakah, America mi 69% chuan silai khuahkhirhna khauh zawk siam an duh a ni.