Taliban sorkarah chanvo pek ve phûtin Kabul-ah hmeichhiaten kawng an zawh

Afghanistan-a Taliban sorkar ding turah hmeichhiate chanvo pek ve phutin Inrinni liam ta khan Kabul khawpuiah hmeichhiaten kawng an zawh.

Presidential palace pana kawng an zawh chu Taliban member-ten finance ministry office luhnabulah an lo dang a, palace an luh an phalsak lo a ni. Taliban-te hian pungkhawmte hi pepper spray leh tear gas-in an lo phuh a ni. Kawngzawhnaa tel hmeichhe pakhat chu Taliban-te hian kut an thlak nia sawi a ni.

Taliban-te hian sorkar an din tha tur chu huamzau zawk leh, hmeichhiate dikna chanvo pawh zahsak an nih dawn thute an lo sawi tawh a, mahse tunhnaiah Taliban senior leader Sher Mohammad Abbas Stanikzai chuan interview a neihah sorkar tharah hian hmeichhiate chu chanvo sang leh pawimawh pek an ni kher lo maithei tih a sawi leh a ni. Hei vang hian lungawi loin kawngzawh hi an huaihawt a, hnathawh phalsak tur leh, sorkar tharah chanvo pawimawh pe ve turin an phut.

Hetih lai hian Taliban kuta la awm ve lo, Kabul hmarlama Panjshir Valley-ah National Resistance Front of Afghanistan (NRF) leh Taliban-te chu an la inbei chhunzawm zel. Pahnshir Valley-ah hian mi nuai 1.5- nuai 2 vel an cheng a, NRF-te hian Taliban-te hi an lo bei let a ni. Taliban-te chuan district tam zawk la tawhin, province laili lam lak tumin an bei mek tih an sawi a, NRF lam hian Taliban-te chu an hual bet mek niin an sawi ve thung.

Taliban-te hian ram aṭanga ram dang sipaite an chhuahfel hnuah sorkar thar an din tur chu an puang dawn tih sawi mah se Panjshir Valley-ah an la inbeih avang hian an la puang lo nia ngaih a ni. NRF-ah Taliban dodaltute bakah Afghan security force-te pawh an tel a, an inbeihnaah hian Taliban firfiak 600 vel an thi tawh nia sawi a ni.