Bangladesh parliament-in hnathawk zinga inneih khap rawtna hnawl

Bangladesh Parliament chuan Inrinni khan independent lawmaker pakhatin an rama hna vang lutuk sutkianna kawng khat atana hnathawh nei ve ve innei khap tura rawtna lut chu a hnawl.

Karim chuan nu leh pa hnathawka chhuak ṭhin fate chuan an awmpuite kut an tuar fo niin a sawi. "Mipa hnathawh nei chuan hmeichhia hnathawh nei vek neih an duh a, hetiang chiahin hmeichhiate chuan hnathawh nei mipa an zawng ve bawk a ni. Hetianga kan kal chhunzawm zel dawn a nih chuan kan ramchhunga hna indaih lohna awm ṭhin hi kan sukiang thei dawn lo a ni," a ti.

House chhunga rawtna lut hian member dangte sawisel leh nuihzat a hlawh hle.

Law minister Anisul Huq chuan he rawtna hi "freedom of speech" lanna a nih thu a sawi a, Karim pawh hian a duhzawng sawi leh zalenna an neih ang chu a hmang ve mai niin a sawi. He rawtna hi a pawm a nih chuan anmahni eizawnna ngei tan pawh a pawi thei dawn tih a sawi.

Karim hi Bogra district hmar khawthlanglam aṭangin kum 2018 khan Parliament member atan thlan tlin a ni a, hmeichhe laka pawngsual a thlen fo chhanah mipa leh hmeichhe intluktlanna atana hmalakna,feminist campaign chu puhin nikum aṭang khan sawiselna lian tak a tawk tawh bawk. Hei bakah hian a Facebook account profile picture atana pistol a keng lai thlalak a hman chuan sawizui pawh a hlawh hle.