Myanmar sipaiten inkahhai puan an remti

Myanmar sipai hotute chuan an rama harsatna tawh mekte chhawmdawlna sem a nih theihna atana Association of Southeast Asian Nations (ASEAN) -in kumin kumtawp thlenga inkahhai puang tura a ngenna chu an remti niin Kyodo news agency chuan a sawi.

ASEAN hian February 1-a sipaiten civil sorkar thuneihna an hnehchhuh hnua tualchhung buaina chhuak leh, tharum thawhna thleng fote chu tihtawp a nih theihnan hma a la a, sipai hotute leh sipai rorelna dodaltute pawh inbiakna a lo neihpui tawh a ni.

Special envoy atana ASEAN-in a ruat, Erywan Yosuf chuan Myanmar foreign minister Wunna Maung Lwin chu video conference neihpuiin, inkahhai puang tur hian a ngen a, a ngenna hi sipaite hian a lo pawmsak a ni tih Pathianni khan a sawi.

Erywan chuan a ngenna pawmsak a nih chungchang hi sawiin, "Hei hi political ceasefire a ni lo a, chhawmdawlna hna thawktute himna leh hna an thawh theihna atana inkahhai hi puan a ni," a ti. Erywab chuan Myanmar ram a tlawhna tur leh, a zin huna Aung San Suu Kyi a hmuh theihna turin sipai sorkar nen hian an in inbe mek tih a sawi bawk.

Inkahhai puang tura a ngenna hi sipai sorkar chuan dodal loin a lo pawmsak a, he a rawtna hi sipai rorelna dodaltu party dangte hnenah pawh a thlen thu a sawi.