Taliban-ten Panjshir Valley an la tih an sawi

Afghanistan khawpui, Kabul hmarchhak lama Panjshir Valley chu nimin khan a la fel ta niin Taliban-te chuan an sawi.

Taliban-te hian Afghanistan hmun tam zawk la a, thuneihna an chan hnuah Panshir Valley hi an la thei mai lo a, he province chhunga National Resistance Front of Afghanistan (NRFA) nen nasa takin an inbei zui a ni.

Nimin khan Taliban chuan social media lamah Panjshir provincial governor compound gate bula an member-te ding lai thlalak pho langin, thuneihna an chan thu an sawi. "Panjshir province chu Islamic Emirate of Afghanistan kutah a awm fel ta" tiin an pawl thupuangtu, Zabihullah Mujahid chuan a sawi. An inbeihnaah hian NRFA mi leh sa eng emaw zat thiin, midangte chu an tlanchhia niin a sawi.

Mujahid chuan, "He biala hnehna kan chan leh tak avangin, kam ram pum chu indona lak aṭangin lakchhuah fel a ni ta. Kan ram mipuite chu thlamuan leh zalen takin ram pumah an awm thei tawh dawn a ni," a ti. Panjshir province mite chungah inthliarna engmah lantir a ni dawn lo tih a sawi a, unau vek an ni tih sawiin an thawhho zel tur thu a sawi. Hetih lai hian NRFA chuan Taliban-te thusawi hi an la chhang lo.

Mipui hmuhah Taliban Supreme leader inlan thuai dawn
Taliban thupuangtu chuan an pawl hotu lu ber, Hibatullah Akhundzada chu a damṭhat thu leh, mipui hmuha a inlan thuai tur thu a sawi.

Akhundzada hi kum 2016, May thla aṭang khan Taliban pawl hotu lu ber a ni a, mahse Taliban-ten Afghanistan-a thuneihna an chan hnuah pawh mipui hmuhah a la inlan lo a, a awmna tak pawh puanzar a ni lo bawk. Kum 60 chuang tawh nia sawi a ni a, Afghanistan-ah a khawsa ber nia sawi a ni bawk.