Israel-a Gilboa Prison aṭangin Palestinian 6 tlanchhuak

Israel hmarlama venhimna khauh tak hnuaia awm, Gilboa Prison aṭangin nimin zing khan Palestinian mi paruk, firfiaka puha thiam loh chantir tawh an tlanchhuak. Israel security service chuan tang tlanchhuakte ngawrh taka zawn nghal an nih thu a sawi.

Mi tang parukte hian an tanna cell-a tuichhe paihnaa tunnel an siam aṭangin an tlanchhuak a ni. An zinga panga chu Israel mite an beih avanga thi tura thiam loh chantir an ni a, pakhat chu Al-Aqsa Martyrs Brigade terror group commander Zakaria Zubeidi a ni a, thubuai 20 chuang a nei a ni. An paruk hian mi hlauhawm tak nia ngaih niin, a hmain an zinga pathumte chuan tlanchhuah an lo tum tawh a ni.

Israel police-te chuan Giboa Prison chhehvel hi ngun takin an dap nghal a, sipaite leh Shin Bet pawhin tang tlanchhuakte zawnna kawngah puiin, drone leh helicopter hmangin an zawng mek.

Prime minister Naftali Bennett, public security minister Omer Barlev leh defence minister Benny Gantz-te pawh chanchin hi hriattir nghal an ni a, Gantz chuan nimin khan Shin Bet hotu Nadav Argaman, Israel Defence Forces Central Command Maj. Gen. Yehuda Fuchs leh IDF Operations hotu Maj. Gen. Oded Basyuk-te a hmu a, tang tlanchhuakte man leh thuai an nih theihna tura beihpui thlak dan turte a sawipui.