China indo thlawhtheihna 19-in Taiwan ram lut

Taiwan chuan nimin khan thuchhuah siamin an ram van boruakah China indo thlawhtheihna eng emaw zat Pathianni khan an lut tih an puang.

An ram defence ministry-in thuchhuah an siamah chuan China indo thlawhtheihna 19 lai an ram boruakah an lut tih an puang a, chung zingah chuan jet fighter-te, nuclear bomb pai thei thlawhtheihna te pawh an tel a, heng thlawhtheihnate hian an ramin air defence identification zone (ADIZ)-a an puan chu an lut a ni, an ti.

Taiwan sorkar hian tunhnai kum eng emaw zat chhung chu an rama China thlawhtheihna an luh chungchang hi an lo sawi fo tawh a, hetichung hian China hian an ram boruak hi an lut fo a ni.

Pathiannia China air force lut zingah hian H-6 bomber nuclear phur thei pali leh anti-submarine aircraft a tel tih chiang takin Taiwan defence ministry chuan an sawi a ni.

ADIZ hi ram pawn a ni a, national airspace niin ram venhimna atan ram dang thlawhtheihnate chu enfiah an ni ṭhin tho thung.

Taiwan defence ministry chuan China thlawhtheihna luhna chin map-te an tichhuak a, China thlawhtheihnate warning pe tur hian combat aircraft-te pawh an tirchhuak ve bawk niin an sawi.

Hemi chungchangah hian China chuan thuchhuah engmah an siam lo thung. China hian Taiwan hi an ram chinah an chhiar a, Taiwan erawh chuan hei hi an pawm lo thung a ni.

Vawi eng emaw zat Taiwan ram boruakah hian an thlawhtheihna an tir tawh a, June thlaah pawh khan ADIZ-ah hian sipai thlawhtheihna 28 lai an lo thlawh luhtir tawh a ni. January thla pawh khan China indo thlawhtheihna 15 an ramah a lut niin Taiwan hian an sawi a, April-ah pawh khan 25 a lut niin an sawi bawk.

China leh Taiwan
• China leh Taiwan hi kum 1940 chhoah khan civil war vangin ṭhenhran a ni a, mahse China sorkar chuan eng kawng emaw takin Taiwan hi neih let leh an tum a ni.

• Taiwan hian anmahni pualin consitution-te pawh nei thlapin mipui thlantlin ram hruaitu an nei a, sipai pawh nuai thuam vel lai an nei mek.

• Taiwan hi thliarkar niin an khawpui chu Taipei a ni a, nikumah khan mi 23,568,378 vel Taiwan-ah hian an awm anga chhut a ni.