World Health Organisation (WHO)

World Health Organisation (WHO) hi United Nations hnuaia specialised agency, international public health chungchang bika mawhphurtu atana din a ni. Geneva, Switzerland-ah headquarters neiin, ram hrang hrangah semi-autonomous regional office paruk leh field office 150 a nei a, kumtin May thlaah an inhmukhawm ṭhin.

WHO hi kum 1948, April 7-ah din niin he ni hi World Health Day-ah hman a ni. WHO governing body, World Health Assembly (WHA) hmasa ber chu kum 1948, July 24 khan neih a ni. WHA hian kumtin assembly neiin, health specialist 34 awmna executive board member turte an thlang ṭhin. WHO budget leh activity pawmtu niin, hmalakna tur leh ngaih pawimawh bik turte duangin, director-general tur an thlang bawk ṭhin. WHO director-general ṭanglai chu Ethiopia foreign minister leh health minister hlui, Tedros Adhanom niin kum nga term hruaitu hna hi kum 2017, July 1 aṭang khan a chelh ṭan a ni.

Khawvel pum huapa hriselna ṭha a awm theihna tura hma la tu niin, hri umbo kawngah hmahruaitu pawimawh tak a ni ṭhin. A hmalakna pawimawh zingah chuan hri inkaichhawn theih - HIV/AIDS, Ebola, Covid-19, malaria leh tuberculosis leh non-communicable disease - heart disease, healthy diet, nutrition, food security, occupational health lam a tel. Tunah hian khawvel puma hripui leng mek, Covid-19 dona leh ram hrang hrangten vaccine an neih theihna turin hma a la mek.

WHO in a tum ber chu hriselna ṭha a awm a, khawvel chu hmun hima siam leh dinhmun derthawng zawkte tana thawh a ni. Health policy siam tir turin thuneihna nei lo mah se, hri leh natna laka invenna leh, hriselna ṭha zawk a awm theihna turin ram hrang hrang sorkar-te chu thurawn pein a thawhpui ṭhin.

Member te
WHO-ah hian United Nations member-te chuan a constitution an pawm thei a nih chuan an tel vek thei. UN member ni lo ram erawh chu World Health Assembly-ah simple majority vote hmangin pawm theih an ni bawk.

Tunah hian member ram 194 awm mekin, hengte hi an awmna bial azirin region parukah ṭhen an ni. UN member zingah Liechtenstein ram tih loh chu member an ni vek.

WHO member ramte hian an thawh tur sum bituk an pek bakah, an duhthuin a hranin an thawhbelh ṭhin bawk. WHO budget hi kum hnih atana duan ṭhin niin, 2020-2021 budget chu USD tluklehdingawn 4.85 a ni a, budget hmasa aiin 9% in a tam zawk.

US chu sum thawhtu lian ber niin, kum 2018-2019 chhung khan USD maktaduai 800 chuang a thawh a, Gates Foundation chu thawhtu tam ber dawttu niin Britain-in an dawt ve leh a ni.

WHO hmalak tawhna ṭhenkhat
1947 WHO hian telex kaltlangin epidemio-logical information service a din.
1950 BCG vaccine hmangin tuberculosis hri danna pek runpui a kalpui ṭan.
1955 Malaria hri umbona tur programme siam a ni a, a hnuah kalpui dan hi siam ṭhain, hmun tam zawkah umbona tih aiin khuahkhirhna tia thlak a ni.
1958 USSR deputy minister of health, Viktor Zhdanov chuan World Health Assembly chu khawvel pum huapa smallpox hri umbona hna kalpui turin a ngen a, Resolution WHA11.54 siam a ni zui nghal.
1965 Diabetes mellitus report hmasa ber siamin, International Agency for Research on Cancer siam a ni.
1967 WHO chuan an headquarters chu Napalce of Nationals-a Ariana Wing aṭangin Geneva-a headquarters sak tharah a sawn.
1967 Samll pox umbo hna kalpuina atan leh disease surveillance method siamna atan USD maktaduai 2.4 a thawh. Hetih hun lai hian khawvela kum khatah small pox vang hian mi maktaduai 2 vel an thi ṭhin.
1974 Expanded Progamme on Immunizaton leh control programme on onchocerciasis ṭan a ni a, hei hi Food and Agriculture Organisation (FAO), United Nations Development Programme (UNDP) leh World Bank-te thawhhona pawimawh tak a ni.
1975 WHO chuan Special Programme for Research and Training in Tropical diseases a siam ṭan a; UNICEF, UNDP leh World Bank-ten an ṭawiawm.
1977 & Essential medicine list hmasa ber siam a ni a, a hnuah hmalakna tur 'Health For All' puan zui a ni.
1986 HIV/AIDS chungchanga khawvel huapa hmalakna a kalpui ṭan. Kum hnih hnuhah hri kai enhran leh thinhrikna thleng ṭhin venna turin hma lak zui a ni a, 1996-ah Joint United Nations Programme on HIV/AIDS (UNAIDS) siam a ni.
1988 Global Polio Eradication Intiative siam a ni.
1995 International Commission for the Certification of Dracunculiasis Eradication (Guinea worm disease eradication; ICCDE) a din a, ICCDE hian WHO hnenah certification pekchhuah tur ramte a hriattir ṭhin.
1998 WHO din champha vawi 50 lawmnaah Director-General chuan nu, naupawmte hriselna ṭha neihna tura hmalak zual a ngaih thu leh, hemi kawnga hmalaknaah hmasawnna a muang hle tih a sawi.
2000 Stop TB Partnership chu UN-a Millenium Development Goals-ah siam a ni.
2001 Measles umbona tura hmalaka siam niin, kum 2007-ah he hri vanga thi chu 68% a tihniam theih a tum.
2002 Chak zawk leh changtlung zawka hmalakna kalpuina turin Global Fund to Fight AIDS, Tuberculosis and Malaria siam a ni.
2006 Zimbabwe tana official HIV/AIDS toolkit hmasak ber chu a thlawp thu a puang.