Cuba-in naupang kum 2 chin tan Covid-19 vaccine semchhuak ṭan

Cuba chuan Thawh-ṭanni khan naupang, kum hnih chin hnenah Covid-19 vaccine a pe chhuak ṭan a, khawvela naupang kum hnih chin hnena vaccine pe hmasa ber ram a ni. Mahse an vaccine hman hi an rama siamchhuah, WHO-in a la pawmpui loh a ni.

Mipui maktaduai 11.2 chenna, Cuba ramah hian March 2020 aṭanga school an khar hnuah tunhnaia school hawn ṭan leh an tum avangin naupang tan hian vaccine hi an pechhuak ṭan a ni. Thawhṭanni kha school year inṭan hun a ni a, mahse zirna hi in lamah, television programme kaltlanga kalpui a la ni thung.

An vaccine hman, Abdala leh Soberana vaccine-te chu naupangah clinical trial an nei zo tawh a, heivanghian a him tawk nia sawiin, Zirtawpni liam ta khan kum 12 chin tan a pechhuak tawh bawk. Thawhṭanni khan Cienfuegos central province-ah kum 2-11 inkar tan vaccine hi pekchhuah leh an ni.

Ram ṭhenkhatah pawh kum 12 leh a chunglam tan vaccine hi pekchhuah a ni mek a, kum 12 hnuai lam tan enchhinna pawh an nei mek bawk.

China, United Arab Emirates leh Venezuela-te chuan kum naupang zawkte tan vaccine semchhuah an tum tih an lo sawi tawh a, mahse Cuba hi a pechhuak hmasa ber a ni ta a ni.

Latin America ram tlemte chauhin kum 12 chin chunglam tan Pfizer vaccine hman phalna an la pechhuak a, China chuan naupang kum 3-17 inkar tan Sinovac leh Sinopharm vaccine hman a phalsak. Cuba rama vaccine hman mekte hi Latin America rama siamchhuah niin, rampum huap leh mithiamte'n zirchianna an la nei lo nia sawi a ni. Vaccine recombinant protein technology hmanga siam niin, heng vaccine hian vawt an mamawh tlem zawk a ni.

Cuba ramah hian hri leng vangin nikum March thla aṭang khan zirna in khar a ni a, kum tawp lamah khan hun rei lote chhung hawn a ni. Mahse kumin January thlaah hri a len thar leh avangin school-te hi khar leh an ni. Sorkar chuan October leh November chhung hian zirna in hrang hrangte chu a tahtawla hawn chhoh an tum tih a sawi a, mahse naupangte hian vaccine an lak phawt a ngai dawn tih a sawi.