G20-in ram rethei zawkte Covid-19 vaccine pek tiam

Group of Twenty (G20) rama health minister-te chuan Thawhṭanni khan ram retheia cheng mipuite hnenah coronavirus darh zel tur venna atan Covid-19 vaccine pek an tiam.

Rome-a ni hnih chhung meeting an neihah hian G20 minister-te chuan ram rethei zawkte sumfaia ṭanpuina pek dan leh, hri darh chak tur venna atana vaccine pek dan tur chungchang an sawiho a, inremna an siam tih Italian Minister of Health Roberto Speranza chuan a sawi.

Meeting zawhah thuchhuah inṭawm an siamah, minister-te chuan thawhhona, lungrualna leh rorelna dik taka kalpui a ṭul thu leh, eng ram mah thlahthlam bik an awm loh a ṭul thute an sawi.

Italy chuan kumin hian G20 president dinhmun a chelh a, meeting pawh hi Italy minister Speranza hian a kaihruai a ni.

"Khawvel huapa vaccine semchhuak turin kan intiam a ni. Kan thawhho loh chuan felfai takin vaccine hi kan semchhuak thei dawn lo a, hei hi Covid-19 hri darh zel tur laka min vengtu tur ber a ni si a ni," tiin Speranza chuan a sawi.

Germany health minister Jens Spahn chuan an ramin kumin ral hma ngeiin ram rethei zawkte tan Covid-19 vaccine dose maktaduai 100 pekchhuah an tum thu a puang bawk. Spahn chuan "Khawvel huapa hri inkaichhawnna kan tihhniam theih hunah hripui leng hi a tawp thei chauh ang," tia sawiin, khawvelah mipui vaccine la ve lo an la awm chhung chu variant thar a lo chhuak zel thei a ni, a ti.

European Union commissioner for health and food safety Stella Kyriakides chuan German Health Minister thusawi hi a ṭawm thu sawiin, kum 2021 ral hmaa khawvel mipui 40% tal hnenah vaccine pechhuak hman turin a ṭul thu a sawi.

"Kan tum ber chu a tam thei ang ber vaccine pekchhuah a ni. Mipui 40% hnena vaccine pe hman turin ṭan kan lak a ngai," tiin Kyriakides chuan a sawi.

Kyriakides chuan sawi chhunzawmin, an hmalakna bulpui ber tur chu vaccine semchhuah tlemna, Africa continent-a vaccine siamchhuah tihtam a nih thu a sawi. Africa rama vaccine siamchhuah tihpun a nih chuan chak zawk leh awmze nei zawkin hmun hrang hrang an hrutchhuak thei dawn tih a sawi a ni.