US-ah Covid-19 kai thar mtd 40 chuang awm tawh

United States-ah Thawhṭanni thleng khan Covid-19 hri kai chu maktaduai 40 chuang an awm tawh tih Johns Hopkins University data tihchhuah chuan a tarlang.

California chu state zinga hri kai tam berna niin, mi 4,421,247 an awm tawh a ni. Texas chuan dawtin hri kai mi 3,706,980 an awm tawh a, Florida-ah 3,352,421, New York-ah 2,304,955 leh Illinois-ah hri kai mi maktaduai 1.5 chuang hmuhchhuah an awm tawh bawk.

Covid-19 kai maktaduai khat chuang hmuhchhuahna state dangte chu Georgia, Pennsylvania, Ohio, North Carolina, New Jersey, Tennessee, Michigan leh Arizona te an ni.

United States hi khawvel ram zinga hri kai tuar na ber a la ni chhunzawm zel a, hri kai hmuhchhuah leh thihpui tamna ber a ni. Khawvel huapa hri kai zinga 18% leh thihpui zinga 14% chu US rama mi an ni.

US-ah hian November 9, 2020 khan Covid-19 hri kai hi maktaduai 10 an tling a, kumin January 1-ah maktaduai 20 leh March 2021 khan hri kai maktaduai 30 an tling hman a ni.

John Hopkind University data-a lan danin, Thawhṭanni thleng khan khawvel pumah Covid-19 hri kai hmuhchhuah tawh hi mi 22,11,32,377 an awm tawh a, hri kai zinga mi 45,75,438 in an thihpui tawh bawk. Thawhṭanni thleng khan khawvel ram hrang hrangah Covid vaccine dose 5,49,35,82,421 semchhuah a ni tawh bawk.