UK-in Myanmar hrekna thar a siam

United Kingdom chuan sipai chakna hmanga civil sorkar paihthlakna, Myanmar ram hrekna thar a siam.

Kumin February 1-a civil sorkar thuneihna hnehchhuhtu, sipaite thawhpuia sum leh ralthuam hmanga puitu company, Htoo Group of Companies leh a dintuy Tay Za an hrek thu UK foreign ministry chuan sawiin, Tay Za hi sipaite hminga ralthuam leina tura inremna siamah pawh a inhnamhnawih a ni, a ti.

Hemi hma hian UK hian Myanmar sipai sorkar nena inzawmna nei mimal leh pawl ṭhenkhate hrekna a lo siam tawh bawk.

UK foreign secretary Dominic Raab chuan hemi chungchangah hian thuchhuah siamin, "Sipai sorkar chuan Myanmar mipuite a beihna chu tihtawp tumna a la lantir lo a ni," tiin an thawhpui ram dangte nen sipai sorkarin pawisawilo mipuite bei a, thahna atana an hman tur ralthuam an lakluh dang turin theihtawp an chhuah dawn tih a sawi. Hrekna thar a siam hmang hian Htoo Group leh Tay Za-an Britain rama an thil neihte chu khawih chet theih lohin dah an ni a, Tay Za hi an rama luh an khap bawk a ni.

Sumdawng lian Tay Za hian sipaiten ralthuam an neih theihna tura human rights nasa taka an palzutna pawh a thlawp a ni tiin, sipai hotu lute nen inzawmna nghet tak an nei a ni, an ti. UK hian sipai nena inzawmna nei Myanmar Gems Enterprise, Myanmar Economic Corporation leh Myanmar Economic Holdigns Ltd pawh a lo hrek tawh bawk.

July thla khan US pawhin sipai sorkara information minister Chit Naing, investment minister Augn Naing Oo, labour and immigration minister Kyint Kyaing leh social welfare minister Thet Thet Khine bakah State Administrative Council-a member pathum leh an chhungte hrekna a lo siam tawk bawk a ni.

Sipaiten February 1-a civil sorkar thuneina an hnehchhuh avanga lungawi lohna chu hmun hrang hrangah an la lantir reng a, nawrh huaihawt zingah mi 1,045 chu sipaite kut tuarin an thi tawh a, mi 6,000 chuang tantir an ni tawh bawk niin rights group, Assistance Association for Political Prisoners chuan a tarlang.