Germany-ah Catalonia hruaitu man

Spain aṭanga inlakhran duh, Catalonia hruaitu hlui Carles Puigdemont chu Germnay-ah man a ni a, hei vang hian Catalonia khawpui, Barcelona-ah mipui lungawi loten Pathianni khan kawng an zawh a, police-te nen a innawr buai zui a ni.

Puigdemont hi Spain laka hel leh inlakhran tuma puh a nih avangin Spain sorkar chuan manna thupek a tichhuak a, Europe ram dangte a ngen hnuin Europre arrest warrant tihchhuah zui a ni. Hei vang hian Germany police-te chuan manin, nimin khan German judge hmaah a inlan a ni. German court hian Spain thuneitute kuta hlan a nih dawn leh dawn loh a ngaihtuah ang.

Nikum October thlaa Catalonia parliament-in Spain laka independence a puan hnuah Puigdemont hi Belgium-ah tlan chhia in a awm zui a ni. Mahse Pathianni khan a car-a Denmark ramri kan a tum laiin German police-te hian an man ta a ni.

Barcelona-ah chuan Puidgemont man a nih avanga lungawi loin mi tam takin kawng an zawh a, Puidgemont chu an president anih thu te an aupui a ni. Kawngzawh zinga ṭhenkaht hian Catalan police-te chu bur ruakten an vawm a, police-te hian hnawhdarh tumin mipui hi an vuak bakah, van lam hawiin silaite pawh an hmetpuak bawk.

Spain chuan Puigdemont-a manna tur thupek hi kar kalta Zirtawpni khan a chhuah thartir leh a ni. Judge Pablo Llarena chuan Catalan hruaitu hlui hi Spain sokar laipuiin a khap chungin nikum October thla khan independence duh leh duh loh chungchangah Catalan mipui ngaihdan la luiah a puh. Vote lak a nih hnuah kum 2017, October 27 khan Catalan parliament chuan independence hi a puang a ni.