Russia diplomat 106 hnawtchhuak
Russian spy hlui Sergei Skripal leh a fanu te tura hrai an nihnaah Russia inhnamhnawiha puhna kal zelah, US leh Europe-a ram 16-te chuan an rama Russia diplomat 106 awmte an hnawtchhuak.
Skripal hi Russian military intelligence officer hlui a ni a, Russia tana enthlak hna a thawh hnuah an ram phatsanin UK tana enthlatua ṭang zuiah puh a ni. Russia-ah man niin, kum 2006 khan US nena tang inthlengnaah chhuah a ni a, UK-ah hian a pem zui ta a ni.
March 4 khan Skripal leh a fanu hi London aṭanga chhimthlang lam km 120 vela hla, Saliburty khuaa shopping centre bula ṭhuthlengah nikhaw hre loa an awm hmuh an ni. Salisbury District Hospital-ah dah niin an dinhmun hi a la ṭha lo hle nia sawi a ni. An pafa hian tur hlauhawm tak, military-grade nerve agent hmanga hrai nia sawi a ni.
Britain Prime Miniser Theresa May-i chuan Skripal-te pafa tur hmanga hrainaah hian Russia sorkar a inrawlh ngei nia puhin, an rama Russian diplomat 23-te chu a hnawtchhuak tawh a ni. Hemi hnu hian US leh Europe ram dangte pawhin an rama Russia palai awmte chu an hnawtchhuak ve leh ta a ni.
US chuan Russian diplomat 60-te chu enthlatuah puhin a hnawtchhuak a, Seattle-a Russian consulate chu a khar bawk. Canada pawhin nerve agent hmanga inbeihna chu thil tenawm leh huatthlala tak a ni tih sawiin, Russia diplomat pali a hnawtchhuak bawk.