China-ah NKorea hotu Kim Jong-Un a zin

North Korea ram hotu lu ber, Kim Jong-Un chu Thawhṭanni khan China-ah a zin niin Japan media-te chuan an sawi.

Japan media-te chuan Kim Jong-Un-a chuanna, special train chu Beijing-ah venhimna khauh tak hnuaiah a tlan luh thu an sawi. He report hi a dik chuan Kim hi kum 2011-a NKorea hotu atana dah a nih hnua ram pawn lama a zinchhuahna hmasa ber a ni ang.

China leh North Korea chuan Kim Jong-Un zin chungchang hi engmah an tarlang lo a, mahse Japan Kyodo news agency chuan Thawhṭanni tlai lam khan Kim hian Beijing hi a thleng niin a sawi. Japanese broadcaster Nippon TV pawhin Kim-a pa, Kim Jong Il-an a dam laia ramdang tlawhna atana a hman ṭhin rel ang chiah chu Beijing rel station-ah hmuh a nih thu sawiin, a video footage pawh a ti­chhuak a ni. He rel hi China sipaite chuan lo hmuakin, limousine dum eng emaw zat an inchhawp bawk a ni. He rel thlenna rel station hi Thawhṭanni chawhnu aṭang khan midangte hman theih loh tura khar niin, police ṭhahnem takin an veng a ni.

Kim Jong Il-an Beijing a tlawh ṭuma a thlenna, Diaoyoutai guest house-ah pawh ṭum dang aia tam vengtu police dah a ni a, compound hmalam meter 50-100 inkar tinah office duty tir an ni. Kim Jong-Il hian thlawhtheihnaa chuan a hlau a, hei vang hian a damlaia ṭum eng emaw zat China a tlawh pawh khan rel hlir a hmang ṭhin a ni. A zin haw hnuah chuan China leh leh North Korea hian a zin thu an puang ṭhin.

US leh South Korea chuan Kim Jong-Un hi a zin ngei leh ngei loh an la finfiah theih loh thu an sawi a, SKorea chuan thil awmdan ngun taka a thli­thlai mek thu a sawi.