Pakistan defence ministry-in Musharraf-a dilna hnawlsak
Pakistan defence ministry chuan President hlui Pervez Musharraf-an an rama a kir huna venhimna pe tura a ngenna chu a hnawlsak.
Pervez Musharraf-a hi Dubai-ah a awm mek a, mahse ram phatsana puhna thubuai a neih vangin Pakistan-a special court-ah a inlan a ngai a ni. Musharraf-a ukil chuan defence ministry hnenah hian ngenna thawnin, Pakistan-a a kir huna Musharraf hi venhimna pe turin a dil a ni. Mahse ministry chuan Musharraf-a venhimna lo pek hi an hna a ni lo tiin dilna hi a hnawlsak.
Musharraf-a hi thuneihna a chan lai, kum 2007-ah emergency puang a, superme court judge eng emaw zat pawn chhuak thei loa hren leh, judge 100 chuang zet a ban chungchangah ram phatsana puhin kum 2014, March thla khan thubuai siamsak a ni. Nikum khan Musharraf chuan a dam loh chhuanlamin in enkawl tura Pakistan a chhuahsan phalsak a dil a, hei hi phalsak a nih hnuah Dubai-ah a kal a, tun thlengin a la awm zui a ni. March 16 khan special court chuan Musharraf-a hi a thubuai hmachhawna Pakistan rama a kir theihna turin a passport bakah national identity card pawh titawp sak turin a ti a ni.