Myanmar general thusawiah UN hotu lungawi lo
UN Secretary-General Antonio Guterres chu Mynamar sipai hotu, Senior General U Min Aung Hlaing-an Rohingya chungchang a sawi danah a lawm lo hle.
Guterres-a thupuangtu, Farhan Haq chuan thuchhuah siamin, UN General Secretary hian Myanmar sipai hotu thusawi duh dan hi mak a tiin a lawm lo hle tih a sawi.
General Min Aung Hlaing hian Kachin state-a thu a sawinaah, Rohingya Muslim-te chu 'Bengali' tia sawiin, heng mite hian Myanmar ram mi leh sate nen an nihphung leh culture-ah in anna engmah an nei lo a ni, a ti.
UN hotu chuan Myanmar ram hruaitu hrang hrangte chu inhuatnate dah ṭha a, an ram mipuite lungrual taka an awm theihna tura hma la turin a ngen. Chi inthliarna tihbo a nih theihna tura hma la tu hruaitu neih a pawimawh thu leh, Rakhine Advisory Commission-in Rohingya chungchang avanga buaina chinfel a nih theihna tura rawtna a siamte pawh a taka kalpui a ngaih thu a sawi a ni. Haq-a thuchhuah chuan secretary-general hian Rakhine state-a tharum thawhna thleng chu a bul ṭhut aṭanga chinfel a ngaih thu leh, mipui mangang leh ṭanpui ngaite tana venhimna leh ṭanpuina pek chu Myanmar sorkar mawhphurhna a ni thu a sawi niin a tarlang bawk.
Hemi rual hian Myanmar sipaite beihpui thlak avanga Bangladesh rama Rohingya mi tam tak tlanchhiate hruai kir leh an nih theihna tura boruak ṭha siam pawh a pawimawh hle tih a sawi bawk. Myanmar sipaite hian nikum August 27 khan an ram hmarlam, Rakhine state-a Rohingya helte lakah beihpui an thlak ṭan a, civil mite pawh an beih tel avangin Rohingya mi nuai ruk chuang chu Bangladesh ramah an tlanchhe tawh a ni.