Myanmar President thar atan Win Myint thlang

Myanmar Parliament chuan nimin khan an ram president thar atan Win Myint an thlang.

Kar hmasa khan Htin Kyaw chu a hriselna ṭhat tawk loh chhuanlamin president aṭangin a bang a, hei vang hian Parliament chuan ni sarih chhung ngeia a thlaktu tur a thlan a ngai a ni.

President a ban hnu hian Lower House speaker, Win Myint hi president dinhmun chuh tumin speaker a nihna aṭangin a bang ve nghal a, kar hmasa kar tawp lam khan vice-president-ah dah a ni. President thar tur hi vice president ni lai, mi pathum aṭangin an thlang a ni. Vice president tang pahnihte chu Myint Swe leh Henry Van Thio te an ni.

President atana thlan thar, kum 66 mi Win Myint hi Aung Suu Kyi-i party, National League for Democracy (NLD) member hlun tak a nih bakah, Suu Kyi-i tana thawktu rinawm tak a ni. President atan thlan ni mah se a hminga ram hotu lu ber niin, thuneihna changtu zawk tur chu Suu Kyi-i a ni dawn tho a ni.

Suu Kyi-i hi ramdang mi pasala neia fate a neih avangin sipai sorkar hunlaia an ram danpui siamah Myanmar ram hotu lu ber, president dinhmun hi a chelh thei lo a ni. Hei vang hian a party NLD-in sorkarna siam mah se, president a ni thei lo a, State Counsellor-ah dah a ni.

President thar Win Myint hi Irrawaddy Delta-a piang niin, Yangon University aṭangin geology leh law a zir a ni. Sipai sorkar hnuaiah khan ṭum eng emaw zat man a lo ni tawh a ni. Kum 1990 inthlanpui, 2012 by-election leh 2015 inthlanpuiah te khan thlan tlin a ni. Kum 2010-ah NLD central executive committee member atan dah a ni a, 2015 inthlanpuia NLD-in sorkarna an chan khan Parliament Lower House speaker-ah dah a ni.