China leh North Korea-in Kim Jong-un zin thu an nemnghet

Media report ṭhenkhatin NKorea ram hotu Kim Jong-un chu China ramah a zin nia an tarlan hnuah, North Korea leh China chuan Kim hi a zin ngei tih an sawichiang ta.

Kum 2011-a North Korea ram hotu lu ber atana dah a nih hnuah Kim Jong-un hian ramdang a tlawhna hmasa ber a ni a, China President Xi Jinping nen Beijing-ah inbiakna hlawhtling tak an nei niin NKorea chuan a tarlang.

China hi NKorea ṭhianṭha ram lian ber niin, NKorea-in SKorea leh US nena summit an neih tur chungchangah pawh a rawn ngei rin a ni. Kim hian Apri thla hian South Korea President Moon Jae-in hmuin, May thlaah US President Donald Trump a hmu dawn bawk a ni.

President Xi Jinping nen an inkawmnaah, Kim Jong-un hian nuclear ralthuam siam pawh tihtawp a tum thu a sawi niin China Xinhua news agency chuan a tarlang. Kim hian an ramin boruak ṭha leh muanawm a awm theihna tura a hmalaknate chu South Korea leh US-in zawmpui a, ṭha taka a lo dawnsawn chuan Korean Peninsula buaina pawh chinfel theih a beisei thu a sawi.

Kim Jong-un hian Pathianni khan Beijing hi thlengin, Thawhlehni khan a haw a ni. Kim hi a nupui Ri Sol Ju bakah senior adviser eng emaw zatin an zui a ni.