US state 12-in Trump-a kaihhruai sorkar khing dawn

US President Donald Trump-a kaihhruai sorkarin 2020 US Census neih turah mipuite chu US citizen an ni em tih zawhna siam tel a tum chu duh loin, hei hi dan tumin US state 12-te chuan sorkar hi khin an tum.

Census neih tur buaipuitu, Commerce Department chuan Justice Department ngenna angin census neih tura hian Voting Rights Act palzut an awm leh awm loh hriat theih nan mipuite chu US citizen an ni em tih zawhna dah tel a ni dawn tih a sawi. Inthlanah hian US citizen chauhin vote an thlak thei a, mahse President Trump chuan kum 2016 president thlanna neihah hian ram chhunga dan loa pem lut, citizen ni loten mi maktaduai telin vote an thlak niin a lo sawi tawh a, mahse a finfiahna erawh a nei lo.

Census neiha citizenship chungchang zawhna siam hnuhnun ber chu kum 1950 kha a ni.

Sawiseltu lam chuan census-a US citizen chungchang zawhna siam tel hian mi tam tak, citizen ni lote chuan information hi anmahni beih letna atan hman hlauthawngin an tel duh loh phah an hlauhthawn thu an sawi. Mi tam tak an tel duh loh chuan census neih hi a rintlak tawk loh phah dawn niin an tarlang bawk.