US Airport-ah Pakistan Prime Minister security check paltlangtir

Pakistan Prime Minister Shahid Khaqan Abbasi chu tun hnaia US a zin ṭum khan, New York-a JFK airport-ah security check paltlangtir a nih thu Pakistan media-te chuan an tarlang a, he thil thleng vang hian an lungawi lo hle.

Pakistan TV channel-ten video footage an tihchhuahah, PM Abbasi hi airport-ah passenger pangngai anga security check aṭanga a bag leh coat keng a kalchhuah lai tihlan a ni a, hei hi social media lamah thehdarh a ni bawk. Pakistan media-te chuan an ram prime minister an lo dawnsawn dan chu thil zahthlak tak a ni tih thu an sawi.

Geo News chuan Pakistan PM hi kar hmasa khan US-ah mimal thil ṭul vangin a zin a, a farnu a tlawh niin a sawi. Abbasi hi inlalian lo mi tak a ni tih sawiin, airport-ah hian khualzin dang te ang bawkin security protocol hi a zawm niin a sawi. Hetihlai hian media ṭhenkhat chuan PM hi diplomatic passport nei chunga khualzin dang anga a awm mai chu an sawisel thung.