Ranjan Gogoi-in RS-ah rinawmna thu a tiam

Chief justice of India hlui Ranjan Gogoi chuan nimin khan Rajya Sabha-ah member ni turin rinawmna thu a tiam a, eptu party lam chuan an helh hle. 

Epty party member-te chuan Ranjan Gogoi-a rinawmna thu tiam chu thil zahthlak takah an ngaih thu an auchhuahpui a, President-in member ni tura a nominate pawh khan sawiselna a nasa tawh hle a ni. Congress chuan thil ngaih thutak tur tak, ram danpui bawhchhiatna ngaihdam theih lo niin an sawi a, CPM pawhin sorkarin judiciary zalenna a zah lohna lian taka an ngaih thu an sawi ve bawk. 

Supreme Court judge retire tawh Justices Madan B Lokur, A K Patnaik, Kurian Joseph leh J Chelameswar-te pawhin an sawisel nasa hle a, Gogoi nominate a ni leh pawm a nihna chuan mi nawlpui rinna a tichhia tih sawiin, judiciary-in zalenna a neih chungchangah pawh zawhna a siam tam hle dawn tih an sawi. 

Justice Lokur chuan Gogoi-a nominate a nih chu thil mak nia a ngaih loh thu sawiin, mak a tih zawk chu nominate a ni hma lutuk zawk kha a nih thu a sawi. Judiciary zalenna, hleih a neih lohna leh a diknaah te zawhna a siam dawn niin a sawi bawk. 

Justice Gogoi thawhpui ṭhin Justice Kurian Joseph pawhin Judiciary zalenna leh hleih neih lohna principle hnuhhniam a nih dan chuan a ṭhawng hle tih a sawi a ni. Ranjan Gogoi hi nikum November 17 khan a retire a, thla li awrh a liam tihah president Ram Nath Kovind chuan RS member tur hian a nomimate nghal a, hemi vang hian sawisel a hlawh nasa hle.