Taliban-in PM leh a cabinet member turte puang

Taliban-te chuan Afghanistan-a sorkar thar hruaitu tur leh a cabinet member turte an puang ta.

Thawlhehni khan Taliban thupuangtu, Zabihullah Mujahid chuan Taliban sorkar thara cabinet member turte a puang. Cabinet member-ah hian an pawl hruaitu upa lamte an tam zawk a, hmeichhia telh an ni lo.

Sorkar hotu, prime minister atan Mohammad Hasan Akund chu ruat a ni. Taliban political office hotu Abdul Ghani Baradar chu deputy leader a ni dawn a, Haqqani network dintu fapa Sirajuddin Haqqani chu interior minister a ni ang.

Taliban pawl dintu, Mullah Omar fapa Mullah Mohammad Yaqoob chu defence minister atan ruat a ni a, acting finance minister-ah Hedayatullah Badri leh foreign minister-ah Doha-a US nen inbiakna an neih ṭuma Taliban aiawhte Amir Khan Muttaqi chu ruat a ni bawk. Prime Minister, deputy PM pahnih leh cabinet minister tur hi 25 chuang ruat an ni a, minister atana ruat zingah hian UN-in firfiaka a puan leh luman nei mek mi panga an tel.

Sorkar thar puan a nih hnuah Taliban Supreme Leader Mullah Haibatullah Akhunzada chuan thuchhuah siam nghalin, sorkar tharhian Afghanistan-a Sharia law a hman dawn thu a sawi. He dan zawm leh chawinung zel tur hian theihtawp an chhuah dawn a, hruaitu tharte hian remna leh muanna, hmasawnna turin an thawk dawn a, hei vang hian Afghanistan chu chhuahsan duh lo turin mipuite a chah.

Akhundzada chuan human rights venhim a ni dawn a, international treaty-te pawh an zahin Islamic law nen inkalh lo a nih chuan an zawm zel tur thu a sawi. Minority leh mi rethei zawkte pawh dikna chanvo chu venhim sak zel an ni dawn a, media lam zalennna leh hmasawnna turin an thawk bawk ang, a ti. Taliban rorelna hnuaiah Afghanistan leilung chu ramdang sipaiten an hman an remti dawn lo tih a sawi nghal bawk.