Indonesia tanina kangmei chhuakah mi 41 thi

Indonesia-a Banten province khawthlang rama tanin chep taka kangmei chhuakah mi 41 an thi a, mi tam takin hliam an tuar tih sorkar thupuangtu chuan a sawi.

Nilaini khan an ram huna zing dar1-2 inkar velah Tangerang Prison Block C-ah kangmei hi a chhuak a, kangmei chhuah chhan tak hi hriatchian a la ni lo a, fire department investigator-te chuan electrical wiring fel loh vang a ni mai thei tia sawiin an enfiah mek.

Tanina kangmei chhuak vang hian mi 70 chuangin hliam an tuar bawk a, an zinga pariatte chu an taksa 90% vel a kang a ni. Taninah hian fire extinguisher an indaih lo hle nia sawi a ni bawk.

Tangerang Prison Block hi ruihhlo kaihhnawiha mante dahna niin, mi 122 awmna tura duan a ni. Kangmei a chhuah lai hian mi engzat chiah nge awm hriat theih la ni lo.

Police thupuangtu Yusri Yunus chuan electrical short circuit vanga kangmei hi chhuaka ngaih a nih thu a sawi a, hliamte hi hospital pahnihah hruaiin tang dangte chu complex dangah sawn nghal an ni tih a sawi bawk.

Tangerang-a tanin hi an ram khawpui Jakarta bula awm niin, tang 600 vel khung len theihna tura ruahman ni mah se mi 2,000 chuang an awm mek tih sorkar data-ah chuan tarlan a ni.

Indonesia-a tanin tawt lutuk hi hun rei tak aṭanga an buaina a lo ni tawh ṭhin a, human rights activist-te pawhin tangte dinhmun ngaihtuah a, a leng tura bithliah chin dah tur pawhin an lo ngen fo tawh ṭhin.