Coronavirus thehdarh vangin kum 5 chhung tang dawn

Vietnam sorkar chuan Thawhṭanni khan an ram mi pakhat, Covid-19 kaihhruaina a bawhchhiat vang leh midang hnena hri a lo kai chhawn avangin kum nga chhung lungina tang turin a hrem.

Vietnam News Agency (VNA)-in a tarlan danin, kum 28 mi Le Van Tri chu hri hlauhawm tak thehdarhah puhin thubuai siamsak a ni a, Thawhṭanni khan Ca Mou province-a People's Court chuan a chungthu hi a ngaihtuah a, kum 5 tang turin a hrem ta a ni.

Vietnam hian coronavirus hri an khuahkhirh hneh avanga fak pawh a hlawh hman hle a, mass testing leh contact tracing dan te, ramria venhim leh quarantine dante hlawhtling takin a kalpui a ni. Mahse kumin April thla tawp lam aṭang khan hri hi a darh chho leh a, an record ṭha tak lo neihte pawh a rawn hliahkhuh chho leh a ni.

Hri a darh leh tak avangin Thawhṭanni aṭang khan an ram khawpui, Hanoi-a chengte chu pawn chhuak lo tur leh, non-essential service zawng zawng pawh titawp turin thuneitute chuan an hriattir.

Hri thehdarha puha thiam loh chantir, Tri hi Ho Chi Minh City aṭangin Ca Mau lam panin a zin a, ni 21 chhung quarantine tura dan siam chu a bawhchhia niin news agency chuan a sawi. Tri hian mi pariat hri a kaichhawng a, an zinga pakhat phei chu hri vang hian a thi a ni.

Vietnam-ah hian Tri bakah hri thehdarhah mi dang pahnih pawh thla 18 leh kum hnih jail tang turin hrem an lo ni tawh bawk.