NASA-in Mars leilungah hlawhtlinna hmel hmu

US space agency, National Aeronautics and Space Administration (NASA) Mars rover, Perseverance chuan Mars-ah lung sample hmasa ber a la thei ta.

Perseverance rover team-te chuan kar hmasa khan core sample thlalak uluk taka an enfiah hnuah hlawhtling takin an verh a, an lachhuak thei ta tih an sawi. Centimeter 70-a sei rock sample an lak hi 'Rochette' tiin an vuah. NASA hian sample an lak hi a tak ngei a ni tih finfiah an duh vangin titanium tube chhungah an khung ṭha a, Thawhṭanni khan chanchin kimchang hi an tichhuak chauh thung.

August thla tir lam khan rock sample lak hi an lo tum tawh a, mahse an lunglak hi a lo nem avangin tube chhunga dah a nih hmain a kehsawm hman a ni. Hemi hnu hian Pasadena, California-a NASA Jet Propulsion Laboratory flight controller-te chuan a ṭum hnihnan lung chang zawk zawng turin hma an la leh ta a, an hlawhtling thei ta a ni.

Mars lung sample lak, Rochette hi Perseverance chhungah dahṭhat a ni rih dawn a, nakkum thlengin sample tam zawk lak belh an la tum. Heng an sample lakkhawmte hi US leh European Union thawkdun chuan zirchiang tura khawvela lak thlak dan an ngaihtuah leh dawn a ni. Eng hunah nge lak thlak an tum dawn tih erawh an la sawi chiang lo.