Mexico tuilianin damdawi-in a chim, 17 an thi

Mexico Hidalgo state-a ruahsur nasa vanga tuilianin damdawi-in a chim a, hei vang hian damdawi-ina enkawl lai mi 17 an thi niin nimin khan an state official-te chuan an sawi.

He chhiatna rapthlak tak thlenna hmun hi Tula khuaah niin, khaw bula lui luang chu nasa taka a len avangin damdawi-in power supply pawh a tichhia niin an sawi bawk. Tualchhung mite chuan damdawi-ina enkawl mek ṭhenkhet chu Covid-19 vanga enkawl an nih thu an sawi bawk a, ṭhenkhat chu oxygen nena uluk taka enkawl mekte an ni.

Chhanchhuah hna thawk nghalin, damlo 40 vel chu an thiar chhuak hman a, hetihlai hian an state governor phurtu lawng pawh luiah hian a pil zui a ni. Governor erawh chuan a hnuah a him thu Twitter kaltlanga sawiin, state thunei-tute chuan chhanchhuah leh chhawmdawl hna an thawh chhunzawm zel tur thu a sawi bawk.

Tuilenna hmunah hian sipaite chu chhanchhuah hna thawk tura tirh an ni a, tuilian vang hian Hidalgo state-a cheng mi 30,000 chuangin harsatna an tawk a ni.

Mexican President Andrés Manuel López Obrador chuan mitthi chungte a tawrhpui thu a sawi nghal a, mipui, tuilianin a tihbuai theih hmuna chengte chu hmun him lama insawn chhuak turin a ngen bawk.

Mexico ram khawpui Mexico City hmar lamah pawh tuilian vangin mi pahnih an thi a ni.

Acapulco bulah lir na takin a nghing
Mexico-a Acapulco bulah nimin khan lir na tak a nghing a, mi pakhatin nunna a chan phah thu report a ni bawk.

Lirnghinna hmun hi Mexico City aṭanga km 370 vela hlaah a ni a, magnitute 7-a nain a nghing a ni. Chenna in eng emaw zat a chhiat bakah power supply pawh a tichhe nasa hle a, Coyuca de Benitez-ah chuan thirban tluin mi pakhat a delh hlum a ni.