Myanmar President thar lalut

Myanmar President thlan thar, Win Myint chu nimin khan rinawmna thu tiamtir a lakluh a ni.

Union Parliament-a president thar atana lakluh a ni hnua thu a sawiah, Win Myint chuan a thil ngaih pawimawh tur pathumte a sawilang nghal. President-in a ngaih pawimawh tur pathum a tarlante chu dan kenkawh leh mipui hmasawnna tura hma lak, ram inpumkhatna leh muanna siam, democratic federal union a din theihna tura ram danpui siamṭhat te a ni.

President thar chuan an rama judiciary dinhmun tlahniam mek thuam chak a ngaih thu te, eirukna tibo tura nasa zawka beih let a ngaih thu te, mihring dikna chanvo humhalh leh ruihhlo khuahkhirh te, mipuite an sum hloh tur veng tura hma lak te, sipai sorkar laia ram an laksakte pekkir leha zangnadawmna pek te, hnathawktute hamṭhatna tur ngaihtuah leh zirlaite tana zirna ṭha leh sang zawk ngaihtuah a ṭul thute a sawi a ni.

Win Myint chuan mipuite tana ṭha zawka rawng an bawlsak theihna tura media sector tihhmasawna a ngaih thute a sawi bawk.